Nynorske barnebøker er prioriterte når bokbåten Epos legg frå kai i Førde fredag. Turneen startar fredag 1. mars, og bokbåten skal innom 41 stadar i Sogn og Fjordane dei neste vekene. Lasta om bord ber preg av at vi er inne i Språkåret 2013, og nynorske barnebøker er altså prioriterte.
Første stopp for bokbåten er Svanøybukt i Flora kommune.
Tilsette frå Sogn og Fjordane fylkesbibliotek mønstrar på bokbåten saman med Klovnen Knut, som står for det kulturelle programmet på vinterturneen. Det vert humor, trylling, musikalske sprell og pussige eksperiment i stykket I regnbuens farger.
Om bord på bokbåten vert det utstillingar, gode boktips, og bibliotekarar som formidlar gode leseopplevingar for store og små.