I dag la regjeringa Støre fram statsbudsjettet for 2024. Det inneheld fleire gode nyheiter for både lesande og skrivande.

Regjeringa føreslår mellom anna å løyve 488,7 mill. kroner til kunstnarstipendordningane. Det er ei auking på 48,2 mill. kroner, som gir grunnlag for å opprette 44 nye stipendheimlar i 2024. I tillegg føreslår regjeringen å auke stipendsatsane frå ca. 229 000 kroner til ca. 318 000 kroner. Opptrappinga av ordningane under Statens kunstnarstipend står sentralt i arbeidet med å styrke arbeidsvilkåra til kunstnarar.

– Det er positivt at regjeringa aukar talet på stipendheimlar, seier NBUs leiar Alexander Løken. – I eit budsjettår der leselyst er ei politisk prioritering, er det sjølvsagt, og på høg tid, at fleire av arbeidsstipenda går til barne- og ungdomsbokforfattarar. NBU vil jobbe aktivt for dette i tida framover.

Produksjonstilskot for teikneseriar er føreslått auka med 2 millionar kroner. Regjeringa trappar dessutan opp satsinga på litteratur, leselyst og språk.

– Å få barn og unge til å lese meir er ei prioritert oppgåve for regjeringa, seier kultur- og likestillingsminister Lubna Jaffery. – Vi jobbar på fleire frontar for å auke leselysta, og nå vil vi styrke tilgangen til variert litteratur der barn og unge er.

Som ein del av satsinga på litteratur og leselyst føreslår regjeringa å styrke litteraturstøtteordningar i Kulturrådet med 7 millionar kroner. Pengane skal gå til skulebibliotekordninga som bidreg til innkjøp og distribusjon av nye bøker til skulebibliotek i grunnskulen, og til produksjon og innkjøp av nye, norske teikneseriar til distribusjon i folkebibliotek og skulebibliotek.

Leselyststrategien kjem i 2024 og er eit samarbeid mellom Kultur- og likestillingsdepartementet og Kunnskapsdepartementet. Også Kunnskapsdepartementet set av pengar til leselyst i sitt budsjett.

– Litteratur og lesing er rett og slett viktig for demokratiet. Det gir ikkje berre gode opplevingar for den enkelte, men handlar også om deltaking i samfunnet,  ytringsfridom og utvikling av språket vårt, seier Jaffery.